منگل کو ڈیرہ اسماعیل خان میں ایک نجی آئل اینڈ گیس ڈرلنگ کمپنی کے کیمپ پر نامعلوم ملزمان کے حملے میں دو پولیس اہلکار شہید اور تین زخمی ہو گئے۔

ایکسپریس نیوز کے مطابق شہید پولیس اہلکاروں کی شناخت عارف اور علی جب کہ زخمیوں کی شناخت اے ایس آئی عالم شیر، فضل شاہ اور عطا الرحمان کے نام سے ہوئی ہے۔

زخمیوں کو ہسپتال منتقل کر دیا گیا جن میں سے ایک کی حالت تشویشناک ہے۔

ڈی ایس پی اصغر علی شاہ نے بتایا کہ حملہ آوروں نے الحاج آئل اینڈ گیس پرائیویٹ ڈرلنگ کمپنی کے کیمپ پر تعینات پولیس اہلکاروں کو نشانہ بنایا۔

قانون نافذ کرنے والے اداروں نے علاقے کو گھیرے میں لے لیا ہے اور نامعلوم حملہ آوروں کی تلاش شروع کر دی ہے جو جائے وقوعہ سے فرار ہونے میں کامیاب ہو گئے۔